Renmen avè m pou m fè djòlè
Pou n fè zanmi m yo wè
Yon bagay mwen te toujou reve
Renmen avè m pou m ka rive kwè
Yo rele m mawozo
Yo di nan lanmou m pap souse zo
Renmen avè m pou m fè w viv paradi
Renmen avè m pou w fè m pa radi
Si m se Adan ou se kòt mwen
Si m se Figawo ou se kòkòt mwen
Wouy! Lanmou sa transande m
Li transfòme m an de
Lanjelis poko leve
Se avè w mwen gen tan ap panse
Wi cheri se pou n renmen
Pou tout moun wè nou men nan men
Mwen swe twòp nan lanmou
Renmen avè m pou m ka tòp nan lanmou
Yo di m lanmou bèl
Renmen avè m pou m ka rive wè l
Katòz fevriye pral rive
Se avè w mwen vle fete
Ane pase,ane ale
Tankou yon flè kè m fane
Pandan zanmi m ap byen pase
M ap soufri tèlman m panse
Renmen avè m non ti chou!
Pou w fè m konn gou lanmou
Solèy mwen poko ap leve
Si se pa ou ki di m bonjou
Jounen m pap demare
Si m pa wè prezans ou
Absans ou fè nuit mwen ante
Nan fenèt ou mwen vle chante
Sèl kouto ki konn kè yanm
Wè pou w ta wè lanmou ki nan kè yan m
Kisa w ap tann pou n ansanm?
Se ou ki pou mete m djanm
Mwen gen tan ba ou ti kè m
Tanpri renmen avè m!
Mikerson Louis
