Ti Fifi ou fè m pale twòp
Tout tan w nan pale ak ti gason
Ou pa menm ko pase mòp
Sèlman ti Fifi sonje m pale w
Pa kite bouch mwen long
Plede mennen jèn fi nan kay la pou fè zong
Wa sonje m konn pale w
Epi w ap fè m malonèt
Depi malè rive w
Anverite l ap rive w nèt
Ti Fifi cheri tande m
Lè m pale w se pou byen w
Tout tan mwen la
Mwen pap kite nenpòt nèg kenbe men w
Jèn fi kounya pa dwe sèvi w egzanp
Lespri w nan fè nwa
Mwen vle sèvi w ti lanp
Ti Fifi lè m voye l lekòl pa al fè woul
Veye kò w ak jèn gason
Yo se kòk ou se poul
Jèn fi kounya kwè nan plizyè mennaj
Bagay sa banm raj
Men jou fèy la tonbe nan dlo
Se pa jou a li pouri
Lè yo pran vakans nèf mwa
Mwen pap gen dan pou ri
Ti Fifi pa okipe zanmi k ap enfliyanse w
Lè malè rive w
Yo menm ankò ap bliye w
Zafè telefòn sa pa bay jèn yo tan ditou
Telefòn sa ki nan men w la ka voye w nan twou
Ti Fifi koute m
Jèn gason kounya se tankou jilèt
Ou mèt bliye lanmou Womeo ak Jilyèt
Se men sòl yo vin touche
Pandan y ap di misye Jènjan
Ou menm ak dlo nan je w ap kouche
Ti Fifi ou konn sa k pase!
Lè m voye w lekòl bat pou w pase
Yon fi ka bèl se vre
Men sa pa vle di li koute chè
Ou konn sa k pase!
Pran fòm kò w tande machè
Tout sa k briye ka atire w
Se nan met bout jip
Ki fè jèn gason toujou ap file w
Ti Fifi fòk mwen di w
Kò fi a se tankou min petwòl
Anpil nèg ap chache anplwaye
Pou yo tann pewòl
Ti Fifi ou pa wè ou pa janm wè Simòn
Se nan twò cho l
Li gwòs manman l voye l nan mòn
Mwen fenk aprann yon nouvèl ki banm sezisman
Adje yo di m li mouri nan akouchman
Bébé a sove
Men li pral fè vi l san manman
Èske se konsa ou ta renmen fini vi w ti fifiz?
Oubyen w ap pran konsèy mwen yo pou w ka yon bon ti fi.
Louis Mikerson
