Ou fè m mal lè w gade m
Lè w gade m mwen blije bese tèt mwen
Tèlman m timid ou
Nan manje zong m ap pèdi dwèt mwen
Ou fè m mal lè w souri
Lè w souri se tankou w te mèt lanati
Mwen vin piti tankou yon foumi
Yon ti foumi ak yon kè k ap grandi
Lè w souri mwen tankou yon afranchi
Ki pa gen kote li pa franchi
Youn nan pi gwo mal ou te ka fè m
Se lè w touche m
Lè w touche m mwen gen tan imajine w k ap douche m
E lè w karese m
Mwen gen tan imajine w k ap kouche m
Ou fè m mal lè w site non m
Paske vwa w fè m eksite
Malgre m lite mwen pa fouti reziste
E lè je w tonbe nan je m
Mwen dekole tankou avyon ki sou pis
Mwen grate tankou chen ki gen pis
Ou fè m mal lè w kajoule m
Lè w kajoule m mwen tankou yon filozòf san sèvo
Mwen tankou sèl grenn pitit ki pa konn sa frè ak sè vo
Ou fè m mal lè w niche m
Se pa paske sa deranje m
Dlo konn prèske koule deran je m
Se vre ou fè m mal anpil
Men se yon mal mwen ka viv
Mwen pap rele aba l,m ap rele viv
Kontinye fè m mal lè w souri
Kontinye fè m mal lè w ap ri
Kontinye fè m mal lè w gade m
Lè w grate m
Paske ou gen tan gate m
Ou fè m mal se vre
Men ak mal sa yo mwen pa vle se vre
Louis Mikerson
