Listwa ti soufri tris
Lè m ap rakonte l ou pap gen dan pou ri
Ti soufri se te yon grenn bannann mi
Sou li yo pat pè gen dan pouri
Ti soufri pat janm gen tan pou tèt li
E nan tèt li w ap wè l penyen de très
Tout travay se li
Lè w gade l w ap wè se detrès
Ti soufri maltrete
Epi l mal tete
Yo akize l tout sa k pa bon
Rad li nwè tankou chabon
Ti soufri pa gen manman li pa gen papa
Li pa gen pèsonn li viv apa
Li dòmi ta leve bonè
Cheve l kannèl solèy midi sèvi l bone
Ti soufri rann sèvis
Gwo kout baton sèvi l mèsi
Yo pase l nan betiz
Yo di l manje atè pa di mèsi
Ti soufri pa gen jaden
Poutan tèt li gen yon chan pou
Lè pou l benyen pa gen savon
Fab pou lave sèvi l chanpou
Ti soufri ap soufri
Nan vizaj li pa fouti gen souri
Li manje apèn li repoze apèn
Lè w gade l ou pa fouti pa gen lapèn
Je l tankou frize
Rèv li yo brize
Ti soufri pa gwosè yon bòt
Men se sou li yo vle fè bòt
Lè pou l manje
Se nan kole tout ti rès
Tèlman yo fè move jès
Pa gen jou li pa nan tristès
Gwo travay jèn gason pap fè se pou li
Tout jouman, imilyasyon se pou li
Ou ka wè l sèlman ou di l kouraj
Poutan ou pa janm wè lè l ap pran kou ak raj
Ti soufri menm jan avè n
Li pa yon moun ki pafè
Men pouki se li k ap peye tout sa l pa fè
Si l pa fè travay kout fwèt
Li pa leve bonè kout fwèt
Si l kriye kout fwèt pi rèd
Sa fè lapèn pou wè ti soufri
Lè l ap dòmi ou mande kot souf li
Fanmi bliye l,lavi jete l
Lanmò menm twaze l
Se pa li ki te mande fèt
Men se chak jou l ap pran defèt
Ti soufri dòmi sou yon atè miyò
Men eta l ou wè atè miyò l
Kòl plen tras
Tout chaplèt li pran kite tras
Bay kou bliye pote mak sonje
Nan pran kou pou li pa gen konje
Ti soufri fè manje li pa dwe goute
Lè pou l kriye dlo je l pa degoute
Bouton fè figil tankou paswa
Mak yo fè po l pa swa
An Ayiti yo fè timoun abi sou tout fòm
Pouki se yo k ap soufri?
Pouki nou fè yo pa ka souri?
San yo pa gen avni
Louis Mikerson
